Cuntrada umida Alp Flix

Ier...

Il glatscher dal Bernina ha sutterrà l’Alp Flix avant 10'000 onns sut  ina stresa da glatsch da 1'000 meters grossezza ed ha furmà foppas e collinas. Entras il squitsch enorm dal glatscher è il fund vegnì stuppà da tala maniera ch’el è vegnì bletsch ed igl èn sa furmadas cun il temp palids.

 Ils onns 1350 èn sa chasads Gualsers sin l’Alp Flix. Els han runcà ils guauds da schembers per gudagnar terren da pascular. Entras la cultivaziun extensiva durant tschientaners è sa furmada ina cuntrada cultivada unica cun pastgiras e prads, separadas ina da l’autra entras mirs sitgs. En il lieu d’extracziun "Gruba" han ins plinavant explotà fin en il 19avel tschientaner minerals da fier e d’arom.

... ed oz

Quatter famiglias abiteschan sur onn sin l’Alp Flix. La stad survegnan ellas cumpagnia da 160 arments e vatgas, 250 nursas ed intginas chauras.
La particularitad da questa cuntrada po vegnir conservada mo entras purs da muntogna che cultiveschan il terren extensivamain e cun quità. Ils prads da las palids bassas vegnan segads per impedir ch’els creschian en.
Dapi il 1988 han lieu mintg’onn, en collavuraziun cun la Pro Natura, enfin a trais champs d’ina emna per giuvenils e creschids. Lur incumbensa: allontanar las chaglias sin las pastgiras, protegier palids sensiblas cun saivs. e reconstruir  mirs sitgs.
Il squitsch sin la cuntrada entras glieud che tschertga recreaziun sa fa valair cunzunt a la fin da l’emna, cura che magari entiras rotschas fan picnic a las rivas dals Lais Blos. Plinavant destrueschan adina puspè sendas traplignadas adina puspè la vegetaziun sensibla lung las rivas dals lais.

"Insla da stgazis Alp Flix"

Tieus alpins, chaglias bassas, e minalvas, creschan oravant tut sin ils terrens sitgs. En la part pli umida creschan minalvas  e charetsch da glitta ed era la drosera carnivora.
Il segund “Di da GEO da la varietad da las spezias” han ins chattà sin l’Alp Flix entaifer in di – sin ina surfatscha da 6 kilometers quadrats ed in stgalim d’autezza tranter 1550 e 2300 meters sur mar –2092 spezias, tranter auter 159 spezias d’algas, 228 spezias da litgen, 524 spezias da plantas da sem, 705 spezias d’insects e 18 spezias da mamifers. Ultra da quai han ins scuvrì ina nova spezia da glimaja. Pervi da questa varietad da las spezias surprendenta ha l’Alp Flix survegnì il surnum dad Insla da stgazis.