• Eveniment natira

Bainvegni tar Eveniment natira, la protecziun da la natira per giuvenils en il Grischun!

Eveniment natira signifitga perscrutar, giugar, sa divertir e scuvrir la natira.
Per uffants e giuvenils da 7 a 17 onns datti per mintgin in program adattà. Per tai forsa siglir enturn en il guaud u alura planisar e realisar l’agen engaschament a favur da la natira? Dai in sguard e catta ora tez!

 

Logo Pro Natura GraubündenLogo WWF GraubündenLogo Bündner Vogelschutz

«Eveniment natira» sa numna la protecziun da la natira per giuvenils en il Grischun. Nossa finamira è d’entusiasmar ils uffants ed ils giuvenils per las bellezzas e las valurs da la natira e da la cuntrada. Forsa s’engaschan els pli tard ina giada per mantegnair e proteger la natira.
Grazia al sustegn finanzial da Pro Natura Grischun, WWF Grischun, la Protecziun dals utschels dal Grischun e dal chantun Grischun pudain nus offrir mintg’onn champs ed excursiuns da differents geners per uffants e giuvenils.

Club dal puz

Avant insaquants onns èn intgins uffants fascinads da la natira s’unids per construir in puz e stgaffir qua tras in spazi vital prezius per raunas, piutschas, luschards, serps, insects ed auters animals e plantas. Quest puz sin il Rossboden a Cuira dovra vinavant tgira. Ed i dat era adina auter da far en la natira.

 



Per questa lavur e per viandar ensemen tras la natira, nua ch’i dat adina bler interessant da scuvrir, sa reuneschan ils uffants dal Club dal puz circa ina giada il mais. Els fan muschnas cun la crappa rimnada, zambregian cun material da la natira, fan in fieu da champ per seser ensemen da gentar ed emprendan qua tras d’enconuscher la natira durant tut las stagiuns... Sas ti per exempel co ch’ils utschels mezmieur chattan puspè lur pitschens suenter lur sgol? Co che las plantas sa preparan per l’enviern? Ch’il salip po udir cun las chommas?

Il Club dal puz è la gruppa da giuvenils dal WWF, da la ProNatura e da l’Associaziun svizra per la protecziun dals utschels. Ils uffants èn tranter 7 e 14 onns; amaturs da la natira interessads che stattan  a Cuira u en ses conturn èn adina bainvegnids.

Pitschna Val Müstair

Pitschna è surtut in’offerta per uffants e giuvenils da la Val Müstair.
Nossas finamiras èn experientschas en la natira, educaziun ambientala e protecziun da la natira pratitgada.

 

Dal mars/avrigl enfin il november faschain nus circa ina giada il mais acziuns davart ils temas natira e protecziun da l’ambient.


Nus elavurain ils temas ensemen cun giugar, zambregiar, star en la natira, viandar, sa far dumondas, experimentar, scuvrir e chapir ils contexts. Per tschertas occurrenzas envidain nus era persunas dal fatg.

Club da giuventetgna

Vuls ti cuntanscher insatge? Esser activ per la protecziun da la natira? U simplamain emprender d’enconuscher la natira ensemen cun auters giuvenils? Alura essan nus il dretg lieu per tai!
Dapi l’avust 2013 datti il nov club da giuventetgna. Qua pos ti passentar sondas plain aventuras ed adina puspè era tscherner sez il tema. U era planisar l’entira sonda ensemen cun la gruppa.

Natira giuvna

Emprender d’enconuscher la natira, sa divertir, esser en il liber, giugar e sa muventar, esser creativ, scuvrir animals e plantas, cuschinar sur il fieu avert, experimentar la vita communabla...
 
Natira giuvna – per uffants da 6-12 onns en la Surselva.

Champs

Il mund ordavert spetga sin vus! Viandar da cuminanza cun lamas tras las muntognas grischunas, ir cun cajac u emprender d’enconuscher chauns da muntanera.

Participescha ad in da noss interessants champs e passenta in’emna nunemblidaivla plaina da gieus, divertiment ed acziuns!