Val Cama - Val Leggia - Val Grono

Il reservat da guaud tanscha da 450 m s.m. enfin al cunfin dal guaud a 2'200 m s.m.  La gronda part dal reservat da guaud natiral garantescha entras il process da protecziun il svilup natiral e dinamic dal guaud senza intervenziun umana. En ils reservats da guaud spezials cuntinuescha u vegn reintroducì l’economia d’alp tradiziunala cun pasculaziun. Qua tras vegn era promovì la diversitad da las cuntradas cultivadas mez avertas cun lur plantas ed animals. Ins ha constatà almain 24 differentas societads da guaud. Il spectrum tanscha dal guaud da vertinets, da chastagners e da ruvers fin a guauds d’ischis, ogna, faus, pigns e lareschs ed als urs dal guaud plantadis da zundrins; ina ritgezza immensa. Il process da protecziun pussibilitescha da survegnir conuschientschas davart il svilup da societads da guaud betg utilisadas, surtut a la fin dal svilup dal guaud e da la vita da las plantas al sid da las Alps. Als viandants sa porschan vistas ed invistas romanticas en guauds situads en bovas e chavorgias cun plantas romusas imposantas, ma era cun laina morta sidretg u per terra.
Las trais valladas èn avertas mo cun sendas da viandar, vias na datti naginas.